ہند آریائی کی مختصر تاریخ

ہند آریائی زبانوں کی تاریخ کو عام طور پر تین بڑے ادوار میں تقسیم کیا جاتا ہے: قدیم ہند آریائی (تقریباً 1500 تا 500 قبل مسیح)، وسطی ہند آریائی (تقریباً 500 قبل مسیح تا 1000 عیسوی) اور جدید ہند آریائی (1000 عیسوی سے اب تک)۔

قدیم دور کو ویدک دور بھی کہا جاتا ہے جس میں رگ وید سمیت چاروں وید اور بعد میں مہابھارت جیسی تصانیف وجود میں آئیں اور سنسکرت اہلِ علم کی زبان کے طور پر ابھری۔

وسطی ہند آریائی دور تین مرحلوں پر مشتمل ہے۔ پہلے مرحلے (تقریباً 500 قبل مسیح تا 1 عیسوی) میں پالی زبان عام بول چال کی زبان بنی اور بدھ و جین مت کی تعلیمات اسی میں محفوظ ہوئیں۔ دوسرے مرحلے (1 تا 500 عیسوی) میں پراکرت زبانیں فروغ پذیر ہوئیں، جن کے پانچ ادبی روپ شمار کیے جاتے ہیں: مہاراشٹری، شورسینی، ماگدھی، ارد ماگدھی اور پیشاچی۔ تیسرے مرحلے (500 تا 1000 عیسوی) میں اپ بھرنش کا دور شروع ہوا، جسے لسانی اعتبار سے زوال یا سادگی کی طرف رجوع کا دور کہا جاتا ہے۔

جدید ہند آریائی دور میں وہ تمام زندہ زبانیں شامل ہیں جو انہی قدیم و وسطی مراحل سے ترقی کرتے ہوئے موجودہ شکل میں پہنچیں۔ شورسینی اپ بھرنش سے مغربی ہندی کی جو شاخ نکلی، اس سے کھڑی بولی، ہریانوی، برج بھاشا، کنوجی اور بندیلی جیسی بولیاں وجود میں آئیں، اور اسی سلسلے کی کڑی کے طور پر کھڑی بولی کو اردو کی بنیادی اساس مانا جاتا ہے۔